ການ​ປ່ຽນ​ແປງ​ຂອງ​ດິນ​ຟ້າ​ອາ​ກາດ​ບໍ່​ແມ່ນ​ໄພ​ຂົ່ມ​ຂູ່​ທີ່​ໄກໂຕແລ້ວ, ໄພດັ່ງກ່າວແມ່ນກຳລັງເກີດຂື້ນເຊີ່ງພວກເຮົາບໍ່ສາມາດປະຕິເສດໃນການປະເຊີນໜ້າກັບໄພຂົ່ມຂູ່ດັ່ງກ່າວໄດ້  ແລະ ​ຜົນ​ກະ​ທົບ​ຂອງໄພດັ່ງກ່າວກໍ່​ນັບ​ມື້​ນັບ​ເພີ່ມຂື້ນ ເປັນວົງກວ້າງ​ໃນ​ທົ່ວ​ໂລກ. ເມື່ອຜົນກະທົບເຫຼົ່ານີ້ຮ້າຍແຮງຂຶ້ນ, ຄົນຮຸ່ນໃໝ່ຈະຕ້ອງມີບົດບາດຢ່າງຕັ້ງໜ້າໃນການແກ້ໄຂວິກິດການດັ່ງກ່າວ, ທັງໃນປະຈຸບັນ ແລະ ໃນຖານະເປັນຜູ້ມີສ່ວນຕັດສິນໃຈໃນອານາຄົດ. ເພື່ອສ້າງຄວາມເຂັ້ມແຂງໃຫ້ແກ່ໄວໜຸ່ມ, ການສຶກສາກ່ຽວກັບການປ່ຽນແປງດັ່ງກ່າວຈື່ງມີຄວາມສໍາຄັນຫຼາຍ.

ຍ້ອນແນວນັ້ນຊຸດຄວາມຮູ້ເສີມ Climate Box ຈື່ງຖືກພັດທະນາຂື້ນເພື່ອສະໜັບສະໜູນຄວາມພະຍາຍາມດັ່ງກ່າວ.  UNDP ໄດ້ພັດທະນາໂຄງການການຮຽນຮູ້ (climate box) ແບບໂຕ້ຕອບນີ້ຂື້ນ ເພື່ອຊ່ວຍໃຫ້ນັກຮຽນໃນໂຮງຮຽນສາມາດຄົ້ນຄວ້າກ່ຽວກັບສິ່ງທ້າທາຍຂອງການປ່ຽນແປງດິນຟ້າອາກາດ ແລະ ເຂົ້າໃຈວິທີການແກ້ໄຂບັນຫາດັ່ງກ່າວ.

ຊຸດຄວາມຮູ້ Climate Box ຍັງປະກອບມີ “ຊຸດຄໍາຖາມກ່ຽວກັບການປ່ຽນແປງດິນຟ້າອາກາດ,” ປະກອບດ້ວຍບັດຄໍາຖາມຈໍານວນ 100 ບັດທີ່ມີຄໍາຖາມ ແລະ ຕໍາຕອບໃຫ້ເລືອກ ທີ່ອອກແບບມາເພື່ອທົດສອບ ແລະ ເຜີຍແຜ່ຄວາມຮູ້ກ່ຽວກັບຫົວຂໍ້ຕ່າງໆກ່ຽວກັບການປ່ຽນແປງດິນຟ້າອາກາດ. ຄໍາ​ຖາມ​ແມ່ນ​ຈັດແບ່ງ​ຕາມ​ຫົວ​ຂໍ້​ ທີ່ສອດ​ຄ່ອງ​ກັບ​ສາມ​ພາກ​ຕົ້ນຕໍຂອງ​ປື້ມຊຸດຄວາມຮູ້ເສີມ Climate box​.

ຊຸດຄວາມຮູ້ ຍັງປະກອບມີໂປສເຕີທີ່ອະທິບາຍກ່ຽວກັບຜົນກະທົບຂອງການປ່ຽນແປງດິນຟ້າອາກາດແລະ ຄໍາແນະນໍາວ່າຄວນເຮັດແນວໃດເພື່ອຫຼຸດຜ່ອນການປ່ອຍອາຍກາກບອນຂອງຕົນເອງ ແລະ ປັບຕົວເຂົ້າກັບການປ່ຽນແປງດິນຟ້າອາກາດ.

ທ່ານສາມາດນໍາໃຊ້ ບັນດາເຄື່ອງມືຕ່າງໆທີ່ນໍາໃຊ້ໃນການຮຽນຮູ້ແບບໂຕ້ຕອບ ແລະ ຄຳແນະນຳຢ່າງລະອຽດຂອງພວກເຮົາທີ່ສ້າງຂຶ້ນເພື່ອສ້າງຄວາມເຂັ້ມແຂງໃຫ້ທັງນັກຮຽນ ແລະ ຜູ້ໃຫ້ຄວາມຮູ້(ຄູ-ອາຈານ)ໃນການຈັດການ ຫຼື ຮັບມືຕໍ່ກັບວິກິດການດ້ານການປ່ຽນແປງດິນຟ້າອາກາດທີ່ເພີ່ມຂຶ້ນ.